Page:Homère - Les dix premiers livres de l’Iliade trad. Salel 1545.djvu/132

<poem> Dont par apres il en pourroit ſortir Pleurs, & ſouſpirs, & ung tard repentir.     Quand les deux Camps commencerent ſe veoir En lieu patent, lors ſe v nt eſmouvoir Maintz coupz de Fleſche, & de Dardes ruerent À l’approcher, & fort ſ’entretuerent. Mais quand on vint à frapper coupz de main, Le meurtre fut plus grand & inhumain. Car on n’oioyt que Regretz des mourans, Et joyeux cryz des vainqueurs demourans : Faulſer Harnoyz, percer & rompre Eſcuz : Telz ſe braver, qui puis eſtoient vaincuz : Et du Chaplis & meurtre nompareil, Inceſlamment couler le ſang vermeil.     Et tout ainſi que les Eaux qui deſcendent     De la Montaigne, & par le val ſ’eſpandent, Sont tres grand bruyt, dont le Paſteur qui loge Bien loing de la, de ſa petite Loge Entend le ſon :Ne plus ne moins eſtoient Ouyz de loing, ceulx qui lors combatoient.     Antilochus entre les Grecs Gendarmes Tres renommé, feit le premier faict d’Armes : Car il occit Echepolus, eſtant Au premier Renc des Troiens combatant. Il le frappa au plus hault du Pennage De ſon Heaulme & puis de grand courage Doubla le coup, tant que la Poincte dure De ſon Baſton, feit au Front ouverture, Et penetra juſques dedans la Bouche, Dont de ce coup mort eſtendu le couche. <poem>