Page:Homère - Les dix premiers livres de l’Iliade trad. Salel 1545.djvu/114

Pour tranſpercer Menelaus le fort.
Et ſi tu fais ce Martial effort,
Ô quel honeur, helas quelle grand gloire
Rapporteras, de ſi belle victoire.
Et meſmement de Paris Alexandre,
Lequel voyant ainſi le ſang eſpandre
De l’ennemy, ſi joyeux en ſera,
Que de beaulx dons te recompenſera.
Prens donc courage, & apreſte ton Arc :
Faiſant ung veu à Phœbus, que du parc
De tes brebis luy ſera faict offrande,
S’il veult permettre accomplir ta demande :
Et ſ’il te donne apres temps & povoir
De ta Cité de Zelie revoir.
À ces beaulx mots. Pandarus conſentit
Trop folement, dont puis ſe repentit.
Alors tira ſon Arc, grand & poly
Hors du fourreau, garny de cuyr boully.
Or c eſt Arc cy, par merveilleux ouvrage,
Fut faict des Cors d’une Chievre ſauvage :
Que Pandarus avoit ſi bien chaſſée,
Que ſur ung roc l’avoit aux flans bleſſée,
Et puis des Cors, par ung ouvrier ſubtil,
Feit faire l’Arc tant propre & tant gentil.
Ces Cors avoient ſeize pas en longueur,
Qui ne povoient fléchir qu’à grand rigueur :
Mais l’Artillier tellement y poſa
L’entendement, que l’arc en compoſa.
Et pour le rendre encores plus duiſant,
Feit les deux boutz d’or fin & reluiſant.
Pandarus donc, ſans vouloir guere attendre,
Tira ceſt Arc, & ſe meit à le tendre,