Nerac, qui m’a suivi au voyage que j’ay faict par deça, et est encore prés de moy pour l’expedition de plusieurs affaires concernant mon service, dont il a expressement charge, vous priant de le faire jouir de la saulvegarde qu’il a pleu à Sa Majesté luy accorder, à ma requeste, et pourveoir qu’il ne soit faict chose au contre, ny pareillement contre celle que j’ay obtenue de Sa dicte Majesté, generale pour madicte ville de Nerac ; vous asseurant que pour ceste heure ne me sçauriés faire plus grand plaisir. Duquel, mon Cousin, j’auray volontiers ma revanche, quand l’occasion s’en presentera ; mais ce sera
d’aussy bon cœur que supplie Dieu vous donner longue et heureuse vie. De Paris, ce xxe jour d’octobre 1573.
Orig. autographe. – Arch. secrètes du Vatican. Copie de M. le comte Marini, archiviste de la Sainte Église Romaine. Envoi de M. l’ambassadeur de France à Rome.
Tres sainct Pere, Ayant par cy-devant desliberé, ainsi que nous en avons desjà adverty Vostre Saincteté, d’envoyer de nostre part quelque notable personaige devers icelle, pour luy rendre en mon nom l’obeissance et soubmission que comme trez humble et devot fils nous luy devons et au Sainct Siege apostolique, et cogneu par les lettres qu’il luy a pleu nous escrire, du premier de novembre dernier, dans les sainctes et vertueuses admonestations qui y sont contenues, de quelle grande et singuliere dilection et charité paternelle elle nous vouloit recueillir et embrasser, nous n’avons peu plus longuement retarder la desclaration que nous sentions estre tenus solemnellement rendre de ceste nostre soubmission et devote obeissance, tant pour l’acquit de nostre debvoir, que l’edification de tous les princes et peuples chrestiens et catholiques. Qui est cause que nous envoyons devers Vostre Saincteté nostre amé et feal le sr de Duras, l’un de nos
