Orig. — B. R. Fonds Béthune, Ms. 8860, Fol. 29 recto.
Mon Cousin, Je vous envoye le substitud de mon procureur de Meilhan[1], pour, suyvant ce que nous avons arresté ensemble, que vous fassiés tout incontinent expedier une commission au sr de Roques-Taillade[2] mon seneschal d’Albret, aulx fins de rompre et faire desmolir ce qui a esté fortifié en deux maisons du dict Meilhan ; et vous prie luy envoyer quelques ungs de voz archers pour assister et voir ce qu’il se fera en cela, suivant ce que vous m’avés promis. Je ne veulx oblier à vous dire comme j’ay ce jourd’hui, suivant notre derniere resolution, commencé à faire travailler à la demolition des fortifications de la maison de Du Casse, et trouvé toute obeissance, comme vous verrés par le procés-verbal que je vous enverray quand le tout sera faict et executé, vous priant encore une fois donner ordre au faict de Meilhan. Et sur ce je prieray le Createur, Mon Cousin, qu’il vous tienne en sa saincte et digne garde. De Bazas, ce xxviije de juillet 1583.
