Orig. autographe. — Collection de M. F. Feuillet de Conches.
Monseigneur, Encores que je ne soys aucunement nommé ne comprins au pouvoir que vous avez baillé à monsr le mareschal de Matignon pour l’execution de vostre edict de pacification en ce pays, comme j’eusse bien desiré, pour faire cognoistre à chascun que vous me voulez tousjours maintenir en l’auctorité qu’il vous a pleu me donner en ce gouvernement, si est-ce qu’en attendant vostre bonne volonté et intention sur ce, et pour ne rien retarder, mais au contraire avancer et faciliter ladicte execution, je suis entré en traicté avec luy et le sr de Believre sur le principal poinct, qui est Perigueux ; de maniere que pour vous faire voir combien je desire de vous complaire et obeir en toutes choses, j’ay, nonobstant toutes difficultez et sans attendre quelques deputez qui me viennent trouver, entendu à l’eschange qu’ilz m’ont proposé de ladicte ville à une autre, ainsi qu’ils vous feront entendre ; m’assurant que vous aurez agreable ce qu’avons arresté pour ce regard, et ne ferés difficulté sur la somme que je demande, comme je vous supplye trez humblement, Monseigneur, et croire que tant plus vous me donnerés des moyens, tant plus me sentiray-je obligé à vostre service, et d’employer pour iceluy tout ce que j’ay en ce monde, ainsy que vous le sçauriés desirer de celuy qui est
Orig. autographe. — Collection de M. le marquis de Biancourt.
Madame, Le desir que j’ay de me conformer à la bonne volonté et intention du Roy mon seigneur, et l’execution de son edict de paci-
