est catholique, et qui a esté fort ruiné par les guerres, a affaire à Vostre Majesté pour son particulier. Je la supplie trés humblement de l’avoir pour recommandé, d’aultant mesme qu’il est employé à remettre et retablir les catholiques selon vostre intention.
Orig. – Arch. de la famille Forget de Fresne. Communication de M. le chevalier Artaud de Montor, membre de l’Institut, allié de la famille Forget.
Monsr Forget, Le Roy mon seigneur, depuis ung an en çà, a creé et erigé en ma baronnye de Chasteauneuf en Thimerais, ung siege d’eslection, où il y a plusieurs officiers pourveuz. Et encores que Sa Majesté ayt accoustumé de prendre la finance de la premiere erection, si est-ce que, vacation advenant des ditz offices ou d’aucuns d’iceulx, elle permet par privilege exprés, que les seigneurs des lieux luy nomment et presentent à iceulx offices, comme elle faict à la Royne sa mere, Monsieur, la Royne de Navarre, Madame de Ferrare et aultres en leurs terres et seigneuryes. Qui me faict vous escripre ceste lettre afin de supplier Sa Majesté qu’il luy plaise me octroyer privillege de luy nommer et presenter aux ditz offices, advenant vacation par mort, resignation, forfaicture ou aultrement, et semblablement aux offices de [juges] royaulx en la dicte baronnye. Je mande à mes officiers audit Chasteauneuf vous envoyer amples memoires, comme je m’asseure qu’ils feront, vous recommandant cest affaire et les aultres dont vous avez charge de moy, vous asseurant que je ne mettray en oubli la peine que vous y prendrez : priant Dieu, Monsr Forget, vous tenir en sa saincte garde.
De Mazeres, ce dernier jour de decembre 1579.
HENRY.
