Pur ço l’ai commencé, ke je voudrai descrire,
Se Jesu Crist le soffre, ki de nus tuz est Sire,
La Vie saint Tomas, celui de Cantorbire,
Ki pur sa mère Iglise fu ocis par martire :
Or est hauz Seinz el Cel, nuls ne l’poet contredire.
De molt divers corages et de diverse vie
Sunt en cest siecle gent ; n’est nulz hom qui l’desdie.
Plusur unt poverté, li alquanz manantie ;
Asquanz aiment le sens et plusur la folie ;
Li asquanz aiment Deu, Satan les plusurs guie.
Seignur, pur amur Deu et pur Sauvaciun,
Laisseiz la vanité, entendeiz al sermun.
N’i ad celui de vus ki n’entende raisun.
Laisseiz del tut ester le conseil al felun :
Mauveis est li guaainz, ke turne à damneisun !
Et Deu, et seinte Iglise, et les clercs honurez,
Les povres herbergez, et paisseiz, et vesteiz,
Et voz dimes partut dreitureument duneiz ;
Des péchiez criminaus de trestuit vus guardeiz.
Veirement le vus di, ke Damnedeu aureiz !
Mut par fu seinte Iglise en cel tens defulée,
Et del conseil le Rei à grant tort demenée ;
Deus en seit merciez, ki l’aveit regardée !
Par seint Tomas serra trestute relevée,
Ke en sufri de mort, de sun gré, la colée !
Fère soleit li Reis as Clers et force et tort,
S’à forfait fusent pris, jà n’i éust resort
K’il n’es fesist juger as lius à lui, à cort.
Saint Tomas les maintint : n’ourent autre confort ;
Pur eus se conbati tant k’en suffri la mort.
Page:Guernes de Pont-Sainte-Maxence - La Vie de Saint Thomas le martyr, Celestin Hippeau, 1859.djvu/62
Le texte de cette page a été corrigé et est conforme au fac-similé.
2
SAINT THOMAS
