« Item, que se trompeurs ou autres menestreurs ont fait marchié ou promis d’aler à une feste que il ne la puissent laissier tant comme ycelle feste durra pour autre prendre.
« Item, que il ne puissent envoier à la feste à laquelle il sont aloués nul autre persone pour euts se ce n’estoit ou cas de maladie, de prison ou d’autre nécessité.
« Item, que nuls menestreurs ou menestrelles, ne aprentiz quelque il soient ne voissent à-val la ville de Paris pour soy présenter à feste ne à nopces pour euls, ne pour autres et s’il fait ou font le contraire qu’il enchée en l’amende.
« Item, que nuls menestreurs aprentis qui voist à-val taverne ne puisse louer autrui que luy ne enviter ou amonester, ou faire aucun mençon de son mestier ou dit louage par fait, ne par parole, ne par signe quelque il soit, ne par interprète coustume, se ne sont ses enfans à marier tant seulement ou de qui les maris soient alé en estrange pais ou estrange de leurs fames, mais se l’en leur demande aucun ménestrel jongleur pour louer qu’il respondent tant seulement à ceus qui les requerront, seigneur, je ne puis alouer autrui que moi mesmes par les ordenances de nostre métier, mais se il vous fault menestreus ou aprentis alés en la rue aus jongleurs, vous en trouverés de bons sanz ce que le dit aprentis qui en sera requis puisse nommer, enseingner, ne présenter aucun par especial et se li aprentis fait le contraire que ses maistres ou lui soient tenuz de l’amende lequel qu’il plaira miex aus maistres du mestier, et se le maistre ne veult paier l’amende que le vallet aprentis soit bannis du mestier un an et jour de la ville de Paris ou au mains jusques à tant que le maistre ou aprentis aient paié l’amende.
« Item, se aucun vient en la rue aus jongleurs pour louer aucuns jongleurs ou jongleresse et sur le premier qui li demanderres appelera pour louer nuls autres ne s’embate en leurs paroles ne ne facent fuers, ne facent faires et ne l’appellent nus autres pour soy présenter ne autrui jusques à tant que li demanderres s’envoit pour louer un autre.
