Page:Gautier - La Chanson de Roland - 1.djvu/544

Le texte de cette page a été corrigé et est conforme au fac-similé.
312
LA CHANSON DE ROLAND

Brandit sun colp, si l’ad mort abatut.
3930A icest colp est li esturs vencuz.
Escrient Franc : « Deus i ad fait vertut.
« Asez est dreiz que Guenes seit penduz
« E si parent ki plaidet unt pur lui. » Aoi.


CCXCIII


Quant Tierris ad vencue sa bataille,
3935Venuz i est li emperere Carles,
Ensembl’od lui de ses baruns quarante,
Naimes li dux, Ogers de Danemarche,
Gefreiz d’Anjou e Willalmes de Blaive.
Li Reis a pris Tierri entre sa brace,
3940Tert lui le vis od ses granz pels de martre,
Celes met jus, puis li afublent altres ;
Mult suavet le chevaler desarment,
Munter l’unt fait en une mule d’Arabe.
Repairet s’en à joie e à barnage.
3945Vienent ad Ais, descendent en la place.
Dès ore cumencet l’ocisiun des altres. Aoi.


CCXCIV


Carles apelet ses cuntes e ses dux :
« Que me loez de cels qu’ai retenuz ?
« Pur Guenelun erent à plait venut,
3950« Pur Pinabel en ostage rendut. »
Respundent Franc : « Ja mar en viverat uns. »
Li Reis cumandet un soen veier, Basbrun :
« Va, si ’s pent tuz à l’arbre de mal fust !
« Par ceste barbe, dunt li peil sunt canut,
3955« S’ uns en escapet, morz es e confunduz. »