« Ceste bataille kar la laisses ester !
« A Carlemagne te ferai acorder ;
« De Guenelun justise ert faite tel
3905« Jamais n’ert jurz que il n’en seit parlet. »
Dist Pinabels : « Ne placet Damne Deu !
« Sustenir voeill trestut mun parentet,
« N’en recrerrai pur nul hume mortel,
« Melz voeill murir qu’ il me seit reprovet. »
3910De lur espées cumencent à capler
Desur cez helmes ki sunt ad or gemmet.
Cuntre le cel en volet li fous tuz clers ;
Il ne poet estre qu’il seient deseveret :
Seinz hume mort ne poet estre afinet. Aoi.
3915Mult par est proz Pinabels de Sorence ;
Si fiert Tierri sur l’helme de Provence :
Salt en li fous, que l’erbe en fait esprendre :
De l’ brant d’acer l’amure li presentet,
Desur le frunt l’helme li en detrenchet,
3920En mi le vis li ad faite descendre,
(La destre joe en ad tute sanglente,)
L’osberc desclot jusque par sum le ventre.
Deus le guarit que mort ne l’ acraventet. Aoi.
Ço veit Tierris que el’ vis est feruz,
3925Li sancs tuz clercs en chet el’ pret herbus :
Fiert Pinabel sur l’helme d’acer brun,
Jusqu’à l’ nasel li ad frait e fendut,
De l’ chef li ad le cervel espandut,
