« Queque Rollanz à Guenelun forsfesist,
« Vostre servise l’en doüst ben guarir.
« Guenes est fels d’iço qu’il le traït,
3830« Vers vus s’en est parjuret e malmis :
« Pur ço le juz jo à pendre e à murir
« E sun cors metre el’ champ pur les mastins,
« Si cume fel ki felonie fist.
« S’ or ad parent ki m’en voeille desmentir,
3835« A ceste espée que jo ai ceinte ici
« Mun jugement voeill sempres garantir. »
Respundent Franc : « Or avez vus ben dit. » Aoi.
Devant le Rei est venuz Pinabels ;
Granz est e forz e vassals e isnels :
3840Qu’il fiert à colp, de sun tens n’i ad mais ;
E dist à l’ Rei : « Sire, vostre est li plaiz ;
« Kar cumandez que tel noise n’i ait.
« Ci vei Tierri ki jugement ad fait ;
« Jo si li fals, od lui m’en cumbatrai. »
3845Le destre guant de cerf el’ puign li met.
Dist li Emperere : « Bons pleges en averai. »
.Xxx. parenz li plevissent leial.
Ço dist li Reis : « E jo l’ vus recrerai. »
Fait cels guarder, tresqu’en serat li dreiz. Aoi.
3850Quant veit Tierris qu’or en ert la bataille,
Sun destre guant en ad presentet Carle.
Li Emperere li recreit par ostage ;
