Païen s’en turnent, ne voelt Deus qu’il i remainent.
Or unt Franceis iço que il demandent. Aoi.
3625Païen s’en fuient, cum Damnes Deus le voelt,
Enchalcent Franc e l’Emperere avoec.
Ço dist li Reis : « Seignurs, vengez voz doels,
« Si esclargiez voz talenz e voz coers ;
« Kar hoi matin vus vi plurer des oilz. »
3630Respundent Franc : « Sire, ço nus estoet. »
Cascuns i fiert tant granz colps cum il poet,
Poi s’en estoerstrent d’icels ki sunt iloec. Aoi.
Granz est li chalz, si se levet la puldre.
Païen s’en fuient, e Franceis les anguissent ;
3635Li enchalz duret d’ici qu’en Sarraguce.
En sum sa tur muntée est Bramimunde,
Ensembl’od li si clerc e si canunje
De false lei, que Deus n’enamat unkes ;
Ordres nen unt ne en lur chefs curunes.
3640Quant ele vit Arrabiz si cunfundre,
A halte voiz s’escrie : « Aïez nus, Mahume !
« E ! gentilz reis, ja sunt vencut noz hume,
« Li Amiralz ocis à si grant hunte ! »
Quant l’ot Marsilies, vers sa pareit se turnet,
3645Pluret des oilz, tute sa chere enbrunket,
Morz est de doel. Si cum pecchet l’encumbret,
L’anme de lui as vifs diables dunet. Aoi.
