« Il est darere od cele gent barbée ;
« Desur lur brunies lur barbes unt getées
« Altresi blanches cume neifs sur gelée.
3320« Cil i ferrunt de lances e d’espées :
« Bataille averum e forte e adurée ;
« Unkes nuls hom ne vit tel ajustée. »
Plus qu’on ne lancet une verge pelée,
Baliganz ad ses cumpaignes passées.
3325Une raisun lur ad dite e mustrée :
« Venez, païen, kar jo ’n irai en l’estrée. »
De sun espiet la hanste en ad branlée,
Envers Carlun l’amure en ad turnée. Aoi.
Carles li magnes, cum il vit l’Amiral
3330E le dragun, l’enseigne e l’estandart,
(De cels d’Arabe si grant force i par ad
De la contrée unt purprises les parz,
Ne mais que tant cum l’Emperere en ad),
Li reis de France s’en escriet mult halt :
3335« Baruns franceis, vus estes bon vassal,
« Tantes batailles avez faites en camps !
« Veez païen, felun sunt e cuart,
« Tute lur leis un dener ne lur valt.
« S’il unt grant gent, d’iço, seignurs, qui calt ?
3340« Ki errer voelt, à mei venir s’en alt. »
Des esperuns puis brochet le cheval,
E Tencendur li ad fait .iiii. salz.
Dient Franceis : « Icist Reis est vassals.
« Chevalchez, bers, nul de nus ne vus falt. » Aoi.
