2690Passent .x. portes, traversent .iiii. punz,
Tutes les rues ù li burgeis estunt.
Cum il aproisment en la citet amunt,
Vers le paleis oïrent grant fremur ;
Asez i ad de la gent païenur,
2695Plurent e crient, demeinent grant dulur,
Pleignent lur deus Tervagan e Mahum
E Apollin, dunt il mie nen unt.
Dit l’uns al altre : « Caitifs ! que devendrum ?
« Sur nus est venue male confusiun,
2700« Perdut avum le rei Marsiliun,
« Li quenz Rollanz li trenchat her le destre puign ;
« Nus n’avum mie de Jurfaleu le Blunt ;
« Trestute Espaigne ert hoi en lur bandun. »
Li dui message descendent à l’ perrun. Aoi.
2705Lur chevals laissent dedesuz un olive :
Dui Sarrazin par les resnes les pristrent.
E li message par les mantels se tindrent.
Puis, sunt muntet sus el’ paleis altisme.
Cum il entrerent en la cambre voltice,
2710Par bel amur à l’ Rei gent salut firent :
« Cil Mahumet ki nus ad en baillie
« E Tervagan e Apollin nostre sire
« Salvent le Rei e guardent la Reïne ! »
Dist Bramimunde : « Or oi mult grant folie :
2715« Cist nostre deu sunt en recreantise :
« En Rencesvals malvaises vertuz firent,
« Noz chevalers i unt lesset ocire,
« Cest men seignur en bataille faillirent,
« Le destre puign ad perdut, n’en ad mie,
