Guenes respunt : « Ne vus à ceste feiz !
« De voz païens mult grant perte i avereiz.
« Lessez la folie, tenez vus al saveir ;
570« L’Emperéur tant li dunez aveir,
« N’i ait Franceis ki tut ne s’en merveilt.
« Pur .xx. ostages, que li enveiereiz,
« En dulce France s’en repairerat li Reis ;
« Sa rere-guarde lerrat derere sei,
575« Ert i sis niés, li quens Rollanz, ço crei,
« E Olivers, li proz e li curteis ;
« Mort sunt li cunte, se est ki mei en creit.
« Carles verrat sun grant orguill cadeir,
« N’averat talent que jamais vus guerreit. » Aoi.
580« — Bel sire Guene, ço dist li reis Marsilies,
« Cum faitement purrai Rollant ocire ? »
Guenes respunt : « Ço vus sai jo ben dire :
« Li Reis serat as meillurs porz de Sizer,
« Sa rere-guarde averat detrès sei mise ;
585« Ert i sis niés li quens Rollanz, li riches,
« E Olivers en ki il tant se fiet ;
« .Xx. milie Francs unt en lur cumpaignie.
« De voz païens lur enveiez .c. milie ;
« Une bataille lur i rendent cil primes :
590« La gent de France ert blecée e blesmie ;
« Ne l’ di pur ço des voz ert là martirie.
« Altre bataille lur liverez de meïsme.
« De quel que seit Rollanz n’estoertrat mie.
« Dunc averez faite gente chevalerie,
595« N’averez mais guere en tute vostre vie. Aoi.
