Vestent osbercs blancs e forz e legiers,
3865 Lur helmes clers unt fermez en lur chiefs,
Ceinent espées enheldées d’or mier,
En lur cols pendent lur escuz de quartiers,
En lur puignz destres unt lur trenchanz espiez ;
Pois sunt muntet en lur curanz destriers.
3870 Idunc plurèrent cent milie chevalier,
Ki pur Rollant de Tierri unt pitiét.
Deus set asez cument la fin en iert. Aoi.
CCCXI.
Dedesuz Ais est la prée mult large.
Des dous baruns justée est la bataille ;
3875 Cil sunt produme e de grant vasselage,
E lur Cheval sunt curant e aate.
Brochent les bien, tutes les resnes lasquent.
Par grant vertut vait férir li uns l’ altre ;
Tuz lur escuz i fruissent e esquassent,
3880 Lur osbercs rumpent e lur cengles départent ;
Les seles, turnent e chiedent en la place :
Cent milie hume i plurent ki ’s esguardent. Aoi.
CCCXII
A tere sunt ambdui li chevalier :
Isnelement se drecent sur lur piez.
3885 Pinabels est forz, isnels e legiers.
L’uns requiert l’altre (n’ unt mie des destriers).
De cez espées enheldées d’or mier
Fièrent e caplent sur cez helmes d’acier,
Grant sunt li colp as helmes detrenchier.
3890 Mult se dementent cil franceis chevalier :
« E Deus ! » dist Carles, « le dreit en esclargiez. Aoi.
