Si fiert celui ki le Dragun teneit :
Craventet ambur en place devant sei
3550 E le Dragun e l’enseigne le Rei.
Baliganz veit sun gunfanun cadeir
E l’estandart Mahummet remaneir ;
Li Amiralz alques s’en aperceit
Que il ad tort e Carlemagnes dreit.
3555 Paien d’Arabe s’en cuntienent plus queit.
Li Emperere recleimet ses Françeis :
« Dites, baruns, pur Deu, si m’aidereiz. »
Respundent Franc : « Mar le demandereiz ;
« Trestut seit fel ki n’i flerget ad espleit ! »Aoi.
CCLXXXVIII
3560 Passet li jurz, si turnet à la vesprée.
Franc e paien i fièrent des espées.
Cil sunt vassal ki les oz ajustèrent,
Mais lur enseignes n’i unt mie ubliées.
Li Amiralz « Preciuse " ad criée,
3565 Carles « Munjoie » l’enseigne renumée.
L’uns conoist l’altre as voiz haltes e cleres ;
En roi le camp ambdui s’entr’encontrèrent :
Si s’ vunt férir, granz colps s’entredunerent
De lur espiez en lur targes roées :
3570 Fraites les unt desuz cez bucles lées.
De lur osbercs les pans en desevrèrent :
Dedenz les cors mie ne s’adeserent.
Rumpent cez cengles, e cez seles versèrent :
Chiedent li rei, à terre s’en œuvèrent ;
3575 Isnelement sur lur piez releverent.
Mult vassalment unt traités les espées.
Ceste bataille nen iert mais desturnée :
Seinz hume mort ne poet estre achevée,Aoi.
