CCLXXXV
3520 Li Amiralz ad sa barbe fors mise,
Altresi blanche cume flur en espine :
Cument qu’il seit, ne s’i voelt celer mie,
Met à sa buche une clere buisine,
Sunet la cler, que si paien l’oïrent.
3525 Par tut le camp ses cumpaignes raliet.
Cil d’Ociant i braient e hennissent,
E cil d’ Argoilles cume chien i glatissent.
Requièrent Francs par si grant estultie,
El’ plus espès si’s rumpent e partissent :
3530 A icest colp en jetent morz set milie.Aoi.
CCLXXXVl
Li quens Ogiers cuardise n’ont unkes ;
Mieldre vassals jamais ne vestit brunie.
Quant de Franceis les eschieles vit rumpre,
Si apelat Tierri le duc d’Argune,
3535 Gefreid d’Anjou e Joceran le cunte,
Mult fièrement Carlun en araisunet :
« Veez paiens, cum ocient voz humes !
« la Deu ne placet qu’el’ chief portez curune,
« S’or n’i ferez pur vengier vostre hunte ! »
3540 N’i ad icel ki un sul mot respundet :
Brochent ad ait, lur chevals laissent curre ;
Vunt les férir là ù il les encontrent.Aoi.
CCLXXXVII
Mult bien i flert Carlemagnes li reis,
Naimes li dux e Ogiers li Daneis,
3545 Gefreiz d’Anjou ki l’enseigne teneit ;
Mult par est pruz danz Ogiers li Daneis ;
Puint le cheval, laisset curre ad espleit,
