E humes braire, contre tere murir,
De grant dulur li poüst suvenir.
Ceste bataille est mult fort à suffrir.
3490 Li Amiralz recleimet Apollin
E Tervagan e Mahum altresi :
« Mi damne deu, jo vus ai mult servit,
« E voz ymagenes tutes ferai d’or fin :
« Cuntre Carlun deignez me guarantir. »
3495 As li devant un soen drut, Gemalfin,
Males nuveles li aportet e li dit :
« Baliganz, sire, mal estes hoi bailliz,
« Perdut avez Malprime vostre fllz,
« E Canabeus vostre frère est ocis.
3500 « A dous Franceis belement en avint :
« Li Emperere en est l’uns, ço m’est vis,
« Grant a le cors, bien resemblet marchis ;
« Blanche ad la barbe cume flur en avril. »
Li Amiralz en ad le helme enclin ;
3505 E, enaprès, si ’n embrunchet sun vis :
Si grant doel ad sempres quidat murir.
Si ’n apelat Jangleu l’ultre-marin.Aoi.
CCLXXXIV
Dist l’Amiralz : « Jangleus, venez avant.
« Vus estes pruz, vostre saveirs est granz,
3510 « Vostre cunseill ai otriet tuz tens.
« Que vus en semblet d’Arrabiz e de Francs,
« Se nus avrum la victorie de l’camp ? »
E cil respunt : « Morz estes, Baliganz.
« la vostre deu ne vus ièrent guarani.
3515 « Carles est fiers, e si hume vaillant :
« Une ne vi gent H si fust cumbatant.
« Mais réclamez les baruns d’Ociant,
« Turcs e Enfruns, Arrabiz e Jaianz.
« Ço qu’ estre en deit ne l’ alez demurant.Aoi.
