« Se jo vif alques, mult grant prud i avreiz. »
3460 Pois, sunt justet par amur e par feid,
Ensembl’od els tel vint milie Franceis.
N’i ad celui n’i flerget e n’i capleit.Aoi.
CCLXXXI
Li Amiralz chevalchet par le camp :
En sun puign tint sun grant espiet trenchant.
Si vait férir le cunte Guineman,
3465 Cuntre le coer li fruisset l’escut blanc,
De sun osberc li derumpit les pans,
Les dous costez li deseivret des flancs,
Que mort l’abat de sun cheval curant.
Pois, ad ocis Gebuin e Lorant,
3470 Richart le vieil, le seignur des Normans.
Paien escrient : " Preciuse est vaillant.
« Ferez, baruns, nus i avum guarant. » Aoi.
CCLXXXII
Ki pois veïst les, chevaliers d’Arabe,
Cels d’Ociant e d’Argoilles e de Bascle !
3475 De lur espiez bien i fièrent e caplent ;
E li Franceis n’unt talent que s’en algent ;
Asez i moèrent e des uns e des altres.
Entresqu’à l’vespre est mult fort la bataille.:
Des francs baruns i ad mult grant damage.
3480 Doel i avrat enceis qu’ele départet. Aoi.
CCLXXXIII
Mult bien i fièrent Franceis e Arrabit ;
Fruissent cez hanstes e cez espiez furbiz.
Ki dune veïst cez escuz si malmis,
Cez blancs osbercs ki dunc oïst fremir,
3485 E cez escuz sur cez helmes cruissir :
Cez chevaliers ki dunc veïst caïr,
