3375 « Veez mun fllz, ki Carlun vait querant
« E à ses armes tanz baruns calenjant ;
« Meillur vassal de lui ja ne demant.
« Succurez le à voz espiez trenchanz. »
A icest mot paien vienent avant,
3380 Durs colps i fièrent, mult est li caples granz.
La bataille est merveilluse e pesant,
Ne fut si fort enceis ne-pois cet tens.Aoi.
CCLXXIV
Granz sunt les oz e les cumpaignes fières,
Justées sunt trestutes les eschieles,
3385 E li paien merveillusement fièrent.
Deus ! tantes hanstes i ad par roi brisiées,
Escuz fruisiez e brunies desmailiées !
Là veïssez la tere si junchiée :
L’herbe de l’ camp, ki ert verte e delgiée,
3390 De l’ sanc des cors est tute envermeilliée.
Li Amiralz recleimet sa maisniée :
« Ferez, baruns, sur la gent chrestiene. »
La bataille est mult dure e afichiée ;
Une einz ne pois ne fut si forz e fière :
3395 Jusqu’à la mort n’en iert fin otriée.Aoi.
CCLXXV
Li Amiralz la sue gent apelet :
« Ferez, paien ; pur el venut n’i estes.
« Jo vus durrai muilliers gentes e beles ;
« Si vus durrai fieus e honurs e teres. » :
3400 Paien respundent : « Nus le devum bien fere.»
A colps pleniers lur espiez il i perdent,
Plus de cent milie espées. i unt traités.
As vus le caple e dulurus e pesme.
Bataille veit cil ki entr’els voeltestre. Aoi.
