« Altresi blanches cume neif sur gelée.
3320 « Cil i ferrant de lances e d’espées :
« Bataille avrum e fort e adurée ;
« Unkes nuls hum ne vit tel ajustée. »
Plus qu’hum ne lancet une verge pelée,
Baliganz ad ses cumpaignes passées.
3325 Une raisun lur ad dite e mustrée :
« Venez ; paien, kar jo sui en l’estrée. »
De sun espiet la hanste en ad branlée ;
Envers Carlun l’amure en ad turnée. Aoi.
CCLXIX
Caries li magnes, cum il vit l’Amiraill,
3330 E le Dragun, l’enseigne e l’estandart,
(De cels d’Arabe si grant force i par ad
De la cuntrée unt purprises les parz,
Ne mais que tant cum l’Emperere en ad),
Li reis de France s’en escriet mult halt :
3335 « Baruns franceis, vus estes bon vassal.
« Tantes batailles avez faites en camp !
« Veez paiens : felun sunt e cuart,
« Tute lur lei un denier ne lur valt.
" S’il unt grant gent, d’iço, seignurs, qui calt ?
3340 « Ki errer voelt, à mei venir s’en alt.
« Ne laisserai que jo ne les asaill. »
Des esperuns pois brochet le cheval,
E Tencendur li ad fait quatre salz.
Dient Franceis : « Icist Reis est vassals.
« Chevalchiez, ber, nuls de nus ne vus falt. » Aoi.
CCLXX
3345 Clers fut li jurz e li soleilz luisant,
Les oz sunt beles e les cumpaignes granz.
Justées sunt les eschieles devant.
Li quens Rabels e li quens Guinemans
Laschent les resnes à lur chevals curanz ;
