3260 E la disme est des barbez de Val-Funde :
Ç’ est une gent ki Deu nen amat unkes.
Geste Francur trente eschieles i numbrent.
Granz sunt les oz ù cez buisines sunent.
Paien chevalchent en guise de produmes.Aoi.
CCLXV
3265 Li Amiralz mult par est riches hum :
Dedevant sei fait porter sun Dragun
E l’estandart Tervagan e Mahum
E une ymagene Apollin le felun.
Dis Caneliu chevalchent envirun,
3270 Mult h alternent escrient un sermun :
« Ki par noz deus voelt aveir guarisun,
« Si ’s prit e servet par grant afflictiun. »
Paien i baissent lur chiefs e lur mentuns,
Lur helmes clers i suzelinent enbrunc.
3275 Dient Franceis : « Sempres murrez, glutuns ;
" De vus seit hoi male cunfusiun !
« Li nostre Deus guarantisset Carlun :
« Ceste bataille seit jugiée en sun num ! » Aoi.
CCLXVI
Li Amiralz est mult de grant saveir ;
3280 A sei apelet sun filz e les dous reis :
« Seignurs baruns, devant chevalchereiz,
« E mes eschieles tutes les guiereiz ;
« Mais des meillurs voeill-jo retenir treis :
" L’une iert de Turcs e l’altre d’Ormaleis,
3285 « E la tierce est des Jaianz de Malpreis.
« Cil d’Ociant ièrent ensembl’od mei :
« Si justerunt à Carle e à Franceis.
« Li Emperere, s’il se cumbat od mei,
