Chevals unt bons e les armes mult-beles.
3065 Cil sunt par els en un val suz un tertre ;
Si ’s beneïst Carles de sa main destre.
Cels guierat Jozerans e Godselmes. Aoi.
CCLIII
E l’oidme eschiele ad Naimes establie.
De Flamengs est e des baruns de Frise.
3070 Chevaliers unt plus de quarante milie ;
la devers els n’iert bataille guerpie.
Ço dist li Reis : « Cist ferunt mun servise. »
Entre Rembald e Hamun de Galice
Les guierunt tut par chevalerie. Aoi.
CCLIV
3075 Entre Naimun e Jozeran le cunte
La noefme eschiele uni faite de prozdumes,
De Loherengs e de cels de Burguigne :
Cinquante milie chevaliers unt par cunte,
Helmes laciez e vestues lur brunies,
Espées ceintes, à lur cols larges dubles ;
3080 Espiez unt forz, e les hanstes sunt curtes.
Se de venir Arrabit ne demurent,
Cil les ferrunt, s’ il ad els s’abandonent.
Si ’s guierat Tierris, li dux d’Argune. Aoi.
CCLV
La disme eschiele est des baruns de France :
3085 Cent milie sunt de nos meillurs catanies.
Cors unt gaillarz e fières cuntenances,
Les chiefs fluriz e les barbes unt blanches,
Osbercs vestuz e lur brunies dublaines,
Ceintes espées franceises e d’Espaigne ;
