Seinz Gabriel, ki de par Deu le guardet,
Lievet sa main, sur lui fait un signacle.
Li Reis se drecet, si ad rendut ses armes :
2850 Si se desarment par tute l’ost li altre.
Pois, sunt munlet, par grant vertut chevalchent
Cez veies lunges e cez chemins mult larges :
Si vunt vedeir le merveillus damage
En Rencesvals, là ù fut la bataille. Aoi.
CCXXXIV
2855 En Rencesvals en est Carles entrez ;
Des morz qu’il troevet cumencet à plurer.
Dist as Franceis : « Seignurs, le pas tenez ;
« Kar mei meïsme estoet avant aler
« Pur mun nevuld que vuldreie œuver.
2860 « Ad Ais esteie, ad une feste anel :
« Si se vanlèrent roi vaillant bacheler
« De granz batailles, de forz esturs campels ;
« D’une raisun oï Rollant parler :
« la ne murreit en estrange règnet
2865 « Ne trespassast ses humes e ses pers :
« Vers lur païs avreit sun chief turnet,
« Cunquerramment si finereit li ber. »
Plus qu’hum ne poet un bastuneel geter,
Devant les altres est en un pui muntez.Aoi.
CCXXXV
2870 Quant l’Emperere vait querre sun nevuld,
De tantes herbes el’ pret œuvat les flurs,
Ki sunt vermeilles de l’ sanc de noz baruns ;
Pitiet en ad, ne poet muer n’en plurt.
Desuz dous arbres parvenuz est amunt ;
2875 Les colps Rollant conut en treis perruns.
Sur l’herbe verte veit gesir sun nevuld ;
Nen est merveille se Carles ad irur.
Descent à pied, alez i est plein curs,
