Ensembl’od lui enmeinet quatre dux.
Tant chevalchat qu’en Sarraguce fut.
Ad un perrun de marbre est descenduz,
2820 E quatre cunte l’estreu li unt tenut.
Par les degrez el’ palais muntet sus ;
E Bramimunde vient curant contre lui ;
Si li ad dit : « Dolente ! si mar fui !
« A itel hunte mun seignur ai perdut.
« Li niés Carlun l’ad mort e cunfundut. »
2825 Chiet li as piez, l’ Amiralz la reçut.
Sus en la cambre à doel en sunt venut. Aoi.
CCXXXII
Li reis Marsilies, cum il veit Baligant,
Dune apelat dous Sarrazins espans ;
« Pernez m’as braz, si m’ dreciez en seant. »
2830 À l’puign senestre ad pris un de ses guanz.
Ço dist Marsilies : « Sire reis Amiranz,
« Mes teres tutes ici quites vus rend,
« E Sarraguce e l’honur k’i apent.
« Mei ai.perdut e trestute ma gent. »
2835 E cil respunt : « Tant sui jo plus dolent.
« Ne pois à vus tenir lung parlement ;
« Jo sai asez que Carles ne m’atent.
« E nepurquant de vus receif le guant. »
A l’ doel qu’il ad s’en est turnez plurant,
2840 Par les degrez jus de l’ palais descent,
Muntet el’ cheval, vient à sa gent puignant.
Tant chevalchat qu’il est premiers devant ;
D’ures en altres si se vait escriant :
« Venez, paien, kar ja s’en fuient Franc. »Aoi.
CCXXXIII
2845 A l’ matinet, quant primes apert l’ albe ;
Esveilliez est li emperere Carles.
