« Li Reis vus mandet que vus le succurez,
« Quite vus cleimet d’Espaigne le règnet. »
E Baliganz cumencet à penser :
Si grant doel ad pur poi qu’il n’est desvez.Aoi.
CCXXX
2790 « — Sire Amiralz, » ço li dist Clariens,
« En Rencesvals une bataille ont hier.
« Morz est Rollanz e li quens Oliviers,
« Li duze Per, que Carles aveit tant chiers ;
« De lur Franceis i ad morz vint milliers.
2795 « Li reis Marsilies le puing destre i perdiet,
« E l’Emperere asez l’ad encalciet.
« En ceste tere n’est remés chevaliers
« Ne seit ocis o en Sebre neiez.
« Desur la rive sunt Franceis herbergiet :
2800 « En cest païs nus sunt tant aproeciet,
« Se vus vulez, li repaires iert griefs. »
E Baliganz le reguart en ad fier,
En sun curage en est joüs e liez ;
De l’ faldestoel se redrecet en piez,
2805 Pois si escriet : « Baruns, ne vus targiez,
« Eissez des nefs, muntez, si chevalchiez.
« S’or ne s’en fuit Carlemagnes li vielz,
« Li reis Marsilies encoi serat vengiez :
« Pur sun puign destre l’en liverrai le chief. »Aoi.
CCXXXI
2810 Paien d’Arabe des nefs se sunt issut ;
Pois, sunt muntet es chevals e es muls.
Si chevalchièrent — que fereient il plus ?
Li Amiralz, ki trestuz les esmut,
Si ’n apelat Gemalfin, un soen drut :
2815 « Jo te cumant, tutes mes oz cundui. »
Pois, est muntez en un soen destrier brun ;
