CCXXVIII
Ço dist Marsilies : « Carles li emperere
« Mort m’ad mes humes, ma tere deguastée
« E mes citez fraites e violées.
« Desur le Sebre ad sa gent année :
« Jo ai cuntet n’i ad que set liwées.
« L’Amiraill dites que s’ost seit amenée ;
« Truver les poet en la nostre cuntrée.
« Par vus li mand, bataille i seit justée :
« Par l’es Franceis ne serai tresturnée. »
De Sarraguce les clefs lur ad livrées.
Li messagier ambedui l’enclinérent :
Prenent cungied, à cet mot s’en turnerent.Aoi.
CCXXIX
Li dui message es chevals sunt muntet :
Isnelernent issent de la citet.
A l’ Amiraill en vunt tut esfreet,
De Sarraguce li présentent les clefs.
Dist Baligauz : « Que avez vus œuvet ?
« U est Marsilies que j’ aveie mandet ? »
Dist Clariens : « Il est à mort naffrez.
« Li Emperere fut. hier as porz passer :
« Si s’en vuleit en dulce France aler.
« Par grant honur se fist rere-guarder :
« Li quens Rollanz, sis niés, i fut remés,
« E Oliviers, e tuit li duze Per,
« De cels de France vint millier d’adubez.
« Li reis Marsilies s’i cumbatit, li ber ;
« Il e Rollanz se sunt entrencontrez.
« De Durendal li dunat un colp tel
« Le destre puign li ad de l’ cors sevret ;
« Sun filz ad mort qu’il tant suleit amer,
« E les baruns qu’il i ont amenet ;
« Fuiant s’en vint, qu’il n’i pout mais ester,
« Li Emperere l’ad encalciet asez.
