Tant chevalchièrent qu’ en Sarraguce sunt.
Passent dis portes, traversent quatre punz,
Tutes les rues ù li burgeis estunt.
Cum il aproisment en la citet amunt,
Vers le palais oïrent grant fremur :
Asez i ad de la gent paienur,
Plurent e crient, demeinent grant dulur,
Pleignent lur deus Tervagan e Mahum
E Apollin, dunt il mie nen unt.
Dit l’uns à l’altre : « Caitifs ! que deviendrum ?
« Desur nus est male cunfusiun.
« Perdut avum le rei Marsiliun :
« Hier li trenchat Rollanz le destre puign.
« Nus n’avum mie de Jurfaleu le Blunt.
« Trestute Espaigne iert hoi en lur bandun. »
Li dui message descendent à l’ perrun.Aoi.
CCXXV
Dui Sarrazin par les resnes les pristrent.
E li message par les mantels se tindrent ;
Pois, sunt muntet sus el’ palais altisme.
Cum il entrèrent en la cambre voltice,
Par bele amur malvais salut i firent :
« Cil Apollin ki nus ad en baillie.
« E Tervagan e Mahum nostre sire
« Salvent le Rei e guardent la Reine ! »
Dist Bramimunde : « Or oi mult grant folio :,
« Cist nostre deu sunt en recreantise
« En Rencesvals malvaises vertuz firent.
« Noz chevaliers i unt laissiet ocire ;
« Cest mien seignur en bataille faillirent.
« Le destre puign ad perdut, n’en ad mie,
« Si li trenchat li quens Rollanz, li riches.
« Trestute Espaigne avrat Carles en baillie.
« Que deviendrai, duluruse, caitive ?
«Lasse ! que n’ai un, hume ki m’ociet ! »Aoi.