Li sire d’els premiers parlat avant :
« Ores oiez, franc chevalier vaillanz :
« Carles li reis, l’emperere des Francs,
« Ne deit mangier, se jo ne li cumant.
« Par tute Espaigne m’ad fait guère mult grant ;
« En France dulce le voeill aler querant :
« Ne finerai en trestut mun vivant,
« Jusqu’il seit morz o tut vifs recreant. »
Sur sun genuill en fiert sun destre guant.Aoi.
CCXXIII
Que ne lerrat, pur tut l’or desuz ciel,
Qu’il alt ad Ais ù Carles soelt plaidier.
Sa gent li lodet, si li ad cunseilliet.
Pois, apelat dous de ses chevaliers,
L’un Clarifan e l’altre Clarien :
« Vus estes filz à l’ rei Maltraïen,
« Ki suleit faire messages volentiers.
« Jo vus cumant qu’en Sarraguce algiez ;
« Marsiliun de meie part nunciez,
« Cuntre Franceis li sui venuz aidier ;
« Se jo trois o, mult grant bataille i iert :
« Si l’en dunez cest guant ad or pleiet,
« El’ destre puign si li faites calcier.
« Si li portez cest bastuneel d’or mier,
« E à mei vienget reconoistre sun fieu.
« En France irai pur Carlun guerreier ;
« S’en ma mercit ne se culzt à mes piez
« E ne guerpisset la lei de chrestiens,
« Jo li toldrai la curune de l’ chief. »
Paien respundent : « Sire, mult dites bien. »Aoi.
CCXXIV
Dist Baliganz : « Kar chevalchiez, baruns ;
« L’uns port le guant, li altre le bastun. »
E cil respundent : « Chiers sire, si ferum.»