Ki tuit maldient Carlun e France dulce.
Ad Apollin en vunt en une crute,
Tencent à lui, laidement l’ despersunent :
« E ! malvais Deus, pur quei nus fais tel hunte ?
» Cest nostre rei pur quei laissas cunfundre ?
« Ki mult te sert, malvais luier l’en dunes. »
Pois, si li tolent sun sceptre e sa curune,
Par les mains l’ pendent desur une culumbe,
Entre lur piez à tere le tresturnent,
A granz bastuns le batent e defruissent,
E Tervagan tolent sun escarbuncle,
E Mahummet enz en un fosset butent,
E porc e chien le mordent e defulent :
Unkes mais Deu ne furent à tel hunte. Aoi.
CCXVIII
De pasmeisun en est venuz Marsilies :
Fait sei porter en sa cambre voltice :
Tante culur i ad peinte e escrite.
E Bramimunde le pluret, la Reïne,
Trait ses chevels, si se cleimet caitive.
À l’altre mot, mult halternent s’escriet :
« E ! Sarraguce, cum les hoi desguarnie
« De l’ gentil rèi ki t’aveit en baillie !
« Li nostre deu i unt fait felunie,
« Ki en bataille hoi matin li faillirent.
« Li Amiralz i ferat ; cuardie,
« S’il ne cumbat a cele gent hardie
« Ki si sunt fier n’unt cure de lur vies.
« Li Emperere od la barbe flurie
« Vasselage ad e mult grant estultie :
« S’il ad bataille, il ne s’en fuirat mie.
« Mult est granz doels que ’n’en est ki l’ ociet. » Aoi.
