Qu’ en Rencesvals ad laissiet morz sanglenz ;
Ne poet muer n’en plurt e ne s’ desment,
E priet Deu qu’as anmes seit guarant.
Las est li Reis, kar la peine est mult grant :
Endormiz est, ne pout mais en avant.
Par tuz les prez or se dorment li Franc ;
N’i ad cheval ki poisset estre en estant :
Ki herbe voelt il la prent en gisant.
Mult ad apris ki bien conoist ahan.Aoi.
CCXV
Seint Gabriel li ad Deus enveiet,
L’Empereur li cumandet à guaitier.
Li Angles est tute noit à sun chief.
Par avisiun li ad anunciet,
Une bataille ki encontre lui iert :
Senefiance l’en demustrat mult grief.
Caries guardat amunt envers le ciel :
Veit les tuneires e les venz e les giels
E les orez, les merveillus tempiers ;
E fous e flambe i est apareilliez !
Isnelement sur tute sa gent chiet ;
Ardent cez hanstes de fraisne e de pumier
E cist escut jusqu’as bucles d’or mier ;
Fruissent cez hanstes de cez trenchanz espiez,
Croissent osberc e cist helme d’acier.
En grant dulur i veit ses chevaliers.
Urs e leupart les voelent pois mangier,
Serpent e guivres, dragua e aversier :
Grifuns i ad plus de trente milliers,
Nen i ad cet à Franceis ne se giet.
E Franceis crient : « Carlemagnes, aidiez ! »
Li Reis en ad e dulur e pitiét,
Aler i voelt, mais il ad desturbier :
Devers un gualt uns granz leün li vient