Naimes li dux d’iço ad fait que pruz ;
Tut premereins dit à l’Empereur :
« Guardez avant de dous liwes de nus ;
« Vedeir puez les granz chemins puldrus,
« Qu’ asez i ad de la gent paienur.
« Kar chevalchiez : vengiez ceste dulur.
« — E Deus, » dist Carles, « ja sunt il là si loinz !
« Cunsentez mei e dreiture e honur : -
« De France dulce m’unt tolue la flur. »
Li Reis cumandet Gebuin e Otun,
Tedbalt de Reins e le cunte Milun :
« Guardez le camp e les vals e les munz,
« Laissiez les morz tut issi cum il sunt,
« Que n’i adeist ne beste ne leun,
« Ne n’i adeist esquiers ne garçun ;
« Jo vus défend que n’i adeist nuls hum,
« Jusque Deus voeillet qu’en cest camp revengium. »
E cil respundent dulcement, par amur :
« Dreiz emperere, chiers sire, si ferum. »
Mil chevaliers i retienent des lur.Aoi.
CCIX
Li Emperere fait ses graisles suner ;
Pois, si chevalchet od sa grant ost, li ber.
De cels d’Espaigne unt les esolos œuvez,
Tiennent l’encalz, tuit en sunt cumunel.
Quant veit li Reis le vespre decliner,
Sur l’herbe verte descent il en un pret,
Se culchet à tere, si priet damne Deu
Que le soleill facet pur lui ester,
La noit targier e le jur demurer.
As li un Angle ki od lui soelt parler ;
Isnelement si li ad cumandet :
« Carles, chevalche : ne te feldrat clartet.
« La flur de France as perdut, ço set Deus ;
2452. As li un angle ki od lui soelt parler. C’est saint Gabriel, comme l
