MORT DE ROLAND
CXCVIII
Ço sent Rollanz que la mort li est près :
Par les oreilles fors en ist li cervels.
De ses pers priet à Dieu que les apelt,
E pois de lui à l’ angle Gabriel.
Prist l’olifant, que reproece n’en ait,
E Durendal s’espée en l’altre main.
Plus qu’ arbaleste ne poet traire un quarrel,
Devers Espaigne en vait en un guaret.
En sum un tertre, desuz dous arbres bels,
Quatre perruns i ad de marbre faiz.
Sur l’herbe verte si est caeiz envers ;
Là s’est pasmez : kar la mort li est près.Aoi.
CXCIX
Halt sunt li pui e mult halt sunt li arbre.
Quatre perruns i ad, luisanz de marbre.
Sur l’herbe verte li quens Rollanz se pasmet.
Uns Sarrazins tuté veie l’esguardet ;
Si se feinst mort, si gist entre les altres.
De sanc luat sun cors e sun visage ;
Met sei sur piez e de curre se hastet.
Bels fut e forz e de grant vasselage.
Par sun orgoill cumencet mortel rage,
Rollant saisit e sun cors e ses armes,
E dist un mot : « Vencuz est li niés Carle.
« Iceste espée porterai en Arabe. »
Prist l’ en sun puign, Rollant tirat la barbe :
En cet tirer, li Quens s’aperçut alques.Aoi.
CC
Ço sent Rollanz que s’espée li tolt,
Uvrit les oilz, si li ad dit un mot :
