Cleimet sa culpe, si reguardet amunt,
Cuntre le ciel ambesdous ses mains juint,
Si priet Deu que pareïs li duinst.
Morz est Turpins el servise Carlun.
Par granz batailles e par mult bels sermun
Cuntre païens fut tuz tens campiun.
Deus li otreit seinte beneïçun !Aoi.
CXCVI
Quant Rollanz veit que l’Arcevesques est morz,
Seinz Olivier une mais n’ ont si grant doel,
E dist un mot ki detrenchet le coer :
« Carles de France, chevalche cum tu poes ;
« En Rencesvals damage i ad des nos.
« Li reis Marsilies i ad perdut ses oz :
« Cuntre un des noz ad bien quarante morz. »Aoi.
CXCVII
Li quens Rollanz veit l’Arcevesque à tere, :
Defors sun cors veit gesir la buele ;
Desuz le frunt li buillit la cervele.
Desur sun piz, entre les dous furcheles,
Cruisiées ad ses blanches mains, les beles.
Forment le pleint à la lei de sa tere :
«E ! gentilz hum, chevaliers de bon aire.
« Hoi te cumant à l’ Glorius celeste ;
« Jamais n’iert hum plus volentiers le servet.
« Dès les Apostles ne fut mais tels prophète
« Pur lei tenir e pur humes atraire.
« la la vostre anme nen ait doel ne suffraite !
« De pareïs li seit la porte uverte !» Aoi.
2245, Lacune comblée. Voir la note du v. 318.