« Pur hanstes fraindre, pur escuz peceicr,
« E pur osbercs derumpre e desmailier,
« E pur produmes tenir e cunseillier,
« E pur glutuns veintre e esmaier,
« En nule tere n’ont meillur chevalier. »Aoi.
CXCIII
Li quens Rollanz, quant il veit morz ses pers
E Olivier, qu’il tant poeit amer,
Tendrur en ont, cumencet à plurer.
En sun visage fut mult desculurez.
Si grant doel ont que mais ne pout ester :
Voeillet o nun, à tere chiet pasmez.
Dist l’Arcevesques : « Tant mare fustes, ber ! » Aoi.
CXCIV
Li Arcevesques, quant vit pasmer Rollant,
Dune ont tel doel, unkes mais n’ont si grant ;
Tendit sa main, si ad pris l’olifant.
En Rencesvals ad un ewe curant ;
Aler i voelt, si’n durrat à Rollant.
Tant s’es forçat qu’il se mist en estant :
Sun petit pas s’en turnet, cancelant.
Il est si fiebles qu’il ne poet en avant ;
N’en ad vertut, trop ad perdut de l’ sanc ;
Einz qu’ hum alast un sul arpent de camp,
Li coers li falt, si est caeiz avant :
La sue mort le vait mult anguissant. Aoi.
CXCV
Li quens Rollanz revient de pasmeisun,
Sur piez se drecet, mais il ad grant dulur ;
Guardet aval e si guardet amunt ;
Sur l’herbe verte, ultre ses cumpaignuns,
Là veit gesir le nobilie barun :
Ç’ est l’Arcevesques, que Deus mist en sun num.
