« Pur vostre amur ici prendrai estai ;
« Ensemble avrum e le bien e le mal,
« Ne vus lerrai pur nul hume de carn ;
« Encoi rendrum à paiens cest asalt ;
« Li meillur colp cil sunt de Durendal. »
Dist l’Arcevesques : « Fel ki bien n’i ferrat !
« Après icest n’avrum jamais asalt.
« Carles repairet, ki bien vus vengerat. » AOI.
CLXXXVIII
Dient païen : « Si mare fumes net !
« Cum pesmes jurz nus est hoi ajurnez !
« Perdut avum noz seignurs e noz pers.
« Carles repairet od sa grant ost, li ber :
« De cels de France odum les graisles clers ;
« Grant est la noise de Munjoie escrier.
« Li quens Rollanz est de tant grant fiertet,
« la n’iert vencuz pur nul hume carnel ;
« Lançum à lui ; pois, si l’ laissum ester. »
E il si firent : darz e wigres asez,
Espiez e lances e museraz enpennez :
L’escut Rollant unt frait e estroet,
E sun osberc rumput e desaffret,
Mais enz el’ cors ne l’uni mie adeset ;
Veillantif unt en trente lius naffret,
Desuz le Cunte si l’i unt mort getet.
Païen s’en fuient ; pois, si l’ laissent ester ;
Li quens Rollanz à pied i est reniés. AOI.
CLXXXIX
Païen s’en fuient mult esfrééement.
Dist l’uns à l’altre : « Vencuz nus ad Rollanz.
« Li Emperere repairet veirement :
« Oez les graisles de la franceise gent ;
« Fiz est de mort ki el’ camp les atent :
2163. — Lacune - comblée. Voir la note du v. 318.
