« Mortels ai plaies es costez e es flancs
« De tutes pars en ist fors li clers sancs ;
« Trestuz li cors m’ en vait afiebliant :
« Sempres murrai, par le mien esciant.
« Jo sui vostre hum e vus tien à guarant :
« Ne me blasmez, se jo m’en vai fuiant.
« — Ne l’ ferai mie, » ço dit li quens Rollanz ;
« Mais or m’aidiez à tut vostre vivant. »
D’ire e de doel en tressuet Rollanz.
De sun blialt ad trenchiez les dous pans :
Guallier en bandet les coslez e les flancs.Aoi.
CLXXXI
Rollanz ad doel, si fut maltalentifs :
En la grant presse cumencet à férir ;
De cels d’Espaigne en ad getet morz vint,
E Gualtiers sis, e l’Arcevesques cinc.
Dient paien : « Feluns humes ad ci.
« Guardez, seignurs, que il n’en algent vif.
« Tant nus unt fait ne deivent estre prins,
« Mais trestuil estre detrenchiet e ocis,
« Tut par seit fel ki ne ’s vait envaïr,
« E recreant ki les lerrat guarir ! »
Dune recumencent e li hus e li cris :
De tutes parz les revunt envaïr.
Deus les aïut qui unkes ne mentit ! Aoi.
CHARLEMAGNE APPROCHE
CLXXXII
Li quens Rollanz fut mult hardis e fiers,
Gualtiers de l’Hum est bien bons chevaliers,
Li Arcevesques prozdum e essaiez ;
