CLXVI
Rollanz esguardet es puis e es valées ;
De paiens veit si très grant aünée.
À Olivier ad dit raisun membrée :
« Ensembl’ od vus ci murrai, cumpainz frère. "
Ambdui el’ camp par amur repairièrent.
Li quens Rollanz la culur ad muée,
Par quatre feiz ont Munjoie criée,
Tint l’olifant, si sunat la menée.
Veillantif brochet tute une randunée ;
Vait les férir à sa trenchant espée. Aoi.
CLXVII
Li quens Rollanz el’ camp est repairiez.
Tient Durendal, cume vassals i fiert.
Faldrun de l’ Pui i ad par roi trenchiet
E vint e quatre de tuz les mielz preisiez ;
Jamais n’iert hum plus se voeillet vengier.
Si cum li cerfs s’en vait devant les chiens,
Devant Rollant si s’en fuient paien.
Dist l’Arcevesques : " Asez le faites bien.
" Itel valur deit aveir chevaliers
" Ki armes portet e en bon cheval siet ;
" En la bataille deit estre forz e fiers,
" O altrement ne valt quatre deniers ;
" Monies deit estre en un de cez mustiers :
" Si preierat tuz jurz pur noz pecchiez. "
Respunt Rollanz : " Ferez, nés espargniez ! »
A icest mot l’unt Franc recumenciet ;
Mult grant damage i ont de chrestiens. Aoi.
1881. Deit monies estre, etc. Ce mépris de Turpin pour les moines se retrouve au commencement de la Chanson d’Aspremont, ou le -terrible
