« Rollant ad mort, ma gent ad cunfundue,
« Si m’ad de l’ chief la curune tolue.
« Par chevaliers n’iert France défendue ! »
Pluret des oilz, trait sa barbe canue.
Dient Franceis : « Dolent ! Mare net sumes. »
Brochent avant, tant cume li port durent :
N’i ad celui la resne ait retenue ;
Einz que la gent de France seit venue,
Avrat Rollanz la bataille vencue,
Le rei Marsilie e sa gent mis en fuie.Aoi.
LA DEROUTE
CLXV
Rollanz reguardet es munz e es lariz ;
De cels de France i veit tanz morz gesir,
E il les pluret cum chevaliers gentilz :
« Seignurs baruns, de vus ait Deus mercit !
" Tutes vos anmes otreit il pareïs
« En seintes flurs il les facet gesir !
« Meillurs vassals de vus unkes ne vi :
« Si lungement tut tens m’avez servit !
" Ad oes Carlun si granz païs cunquis !
« Li Emperere tant mare vus nurrit.
« Tere de France, mult estes dulz païs,
« Hoi es déserte de tanz baruns de pris.
« Baruns Franceis, pur mei vus vei murir :
« Jo ne vus pois tenser ne guarantir ;
« Aït vus Deus, ki unkes ne mentit !
« Olivier, frère, vus ne dei jo faillir ;
« De doel murrai, s’ altre ne m’i ocit.
« Sire cumpainz, alum i reférir ! » Aoi.
1868. Lacune comblée. Voir la note du y. 318.
