« Mielz valt mesure que ne fait estultie.
« Franceis sunt mort par vostre legerie ;
« Carles jamais de nus n’avrat servise.
" Se m’ creïssiez, venuz i fust mis sire,
« Ceste bataille oüssum départie ;
« O pris o morz i fust li reis Marsilies.
« Vostre proecce, Rollanz, mar la veïsmes.
" Carles li magnes de vus n’avrat aïe :
« N’iert mais tels hum desques à l’ Deu juïse.
« Vus i murrez, e France en iert hunie.
« Hoi nus defalt la leial cumpaignie :
« Einz le vespre iert mult grief la départie. »
Li uns pur l’altre si pluret e si suspiret.Aoi.
CLV
Li Arcevesques les ot cuntrarier :
Le cheval brochet des esperuns d’or mier,
Vint tresqu’ad els, si’s prist à castier :
« Sire Rollanz, e vus, sire Oliviers,
« Pur Deu vus pri, que ne vus curruciez.
« Veez Franceis, luit sunt à mort jugiet.
" la li corners ne nus avreit mestier :
« Loinz nus est Carles, tart iert à l’ repairier.
« Mais nepurquant si est il asez mielz
« Vienget li Reis, si nus purrat vengier ;
« la cil d’Espaigne n’en deivent turner liet.
« Nostre Franceis i descendrunt à pied,
« Truverunt nus e morz e detrenchiez,
« Recuillerunt e noz buz e noz chiefs,
« Leverunt nus en bières sur sumiers,
« Si nus plurrunt de doel e de pitiét,
« Enfuirunt en aitres de mustiers,
« N’en mangerunt ne lu, ne porc, ne chien. »
Respunt Rollanz : " Sire, mult dites bien. » Aoi.
1752. Lacune "comblée. Voir la note du t. 318. = Roland dit : « Je veux
