CXLV
Li quens Rollanz en apelet Olivier :
« Sire cumpainz, se l’ vulez otrier,
« Li Arcevesques est mult bons chevaliers :
« Nen ad meillur en tere desuz ciel,
« Bien set férir e de lance e d’espiet. »
Respunt li Quens : « Kar li alum aidier ! »
A icest mot l’unt Franc recumenciet ;
Dur sunt li colp e li caples est griefs :
Mult grant dulur i ad de chrestiens. Aoi.
CXLVI
Li Franc de France unt lur armes perdues.
Uncore i unt treis cenz espées nues :
Fièrent e caplent sur les helmes ki luisent.
Deus ! tante leste i ont par roi fendue,
Tanz osbercs fraiz, tantes brunies rumpues !
Trenchent les piez, les puingz e la faiture.
Dient paien : « Franceis nus desfigurent.
« Ki ne s’ defent de sa vie n’ad cure. »
Dreit vers Marsilie unt leur veie tenue ;
A voiz escrient : « Bons reis, kar nus aïue. "
E dist Marsilies, s’ont sa gent entendue :
" Tere majur, Mahummet te destruet !
" La tue gent la meie ad cunfundue :
« Tantes citez m’ ad fraites e tolues
" Que Carles tient, ki la barbe ad canue !
« Rume cunquist, Calabre ad retenue,
« Costentinnoble e Saisunie la drue.
" Mielz voeill murir que pur Franceis m’en fuie.
" Ferez, paien, que nuls ne s’asoüret.
" Se Rollanz muert, Karles perdrai s’ aïude.
" E, se il vit, la nostre avum perdue. » Aoi.
1677. A icest mot, etc. " Lorsque Roland vit ses hommes tomber ainsi, il courut tout au milieu de l’armée, et frappa des deux mains. Olivier en
