Armes n’unt mais pur défendre lur cors.
Quant lur remembret des graisles e des corns,
Nen i ad un ne se facet plus forz.
Païen escrient : « Mar venimes as porz ;
« Li granz damages en est turnez as noz. »
Laissent le camp, as noz turnent les dos.
Franceis i fièrent de l’espée granz colps ;
Tresqu’à Marsilie vait li traïns des morz. Aoi.
CXLIII
Marsilies veit de sa gent le martirie,
Si fait suner ses corns e ses buisines ;
Pois, si chevalchet od sa grant ost banie.
Devant chevalchet uns Sarrazins, Abismes ;
Plus fel de lui n’ont en sa cumpaignie ;
Teches ad males e mult granz felunies.
Ne creit en Dieu le filz seinte Marie.
Issi est neirs cume peiz k’ est démise ;
Plus aimet il traïsun e boisdie
Qu’il ne fesist trestut l’or de Galice :
Unkes nuls hum ne l’ vit juer ne rire.
Vasselage ad e mult grant estultie :
Pur ço est druz à l’ felun rei Marsilie,
Sun dragun portet à quei sa gent s’alient.
Li Arcevesques ne l’amerat ja mie.
Cum il le vit, à férir le désiret ;
Mult queiement le dit à sei meïsme :
« Cil Sarrazins me semblet mult hérites.
" Unkes n’amai cuard ne cuardie.
« Mielz voeill murir que jo ne l’alge ocire. " Aoi.
1628. Marsilies, etc. La Keiser Karl Magnus’s kronike intercale ici le récit d’un songe de l’Empereur : c’est le fameux songe de la tempête qui se trouve
