Françeis reclciment Rollant e Olivier :
« Li duze Per, kar nus venez aidier. »
Li Arcevesques lur respunt tut premiers :
« Hume de Dieu, faites vus bald e fier ;
" Hoi recevrez curunes en voz chiefs ;
« Seinz Pareïs iert à vus otriez. "
Entre els i ont e dulur e pitiét.
L’uns pluret l’altre par mult grant amistiet,
Par caritet se sunt entrebaisiez.
Rollanz escriet : « Baruns, or chevalchiez ;
« Marsilies vient à cent mil chevaliers. »Aoi.
CXXVI
Marsilies vient par roi une valée
Od sa grant ost que il ont asemblée.
Ses vint eschieles ad li reis anumbrées.
Luisent cil helme as pierres d’or gemmées,
E cil espiet, cez enseignes fermées,
E cil escut e cez brunies safrées.
Set milie graisle i sunent la menée :
Grant est la noise par tute la cuntrée.
Ço dist Rollanz : « Olivier, cumpainz, frère,
« Guenes li fel ad nostre mort jurée ;
« La traïsun ne poet estre celée.
« Mult grant venjance en prendrat l’Emperere.
« Bataille avrum e forte adurée :
« Unkes mais hum tel ne vit ajustée.
« Jo i ferrai de Durendal m’espée..
" E vus-, cumpainz, ferez de Halteclere.
« En tantes teres les avum nus portées !
" Tantes batailles en avum afinées !
" Male cançun n’en deit estre cantée." Aoi.
CXXVII
Quant Franceis veient que paiens i a tanz,
De tutes parz en sont ouvert li camp,
