CXXIV
Li quens Rollanz est chevalier membres,
E Oliviers e luit li duze Per,
E li Franceis ki bien funt à loer ;
Paiens unt morz par lur grant poestet ;
De cenz milliers nen est qu’uns escapez,
C’est Margariz : s’en est fuiant turnez.
Se il s’en fuit, ne fait mie à blasmer :
De sun cors poet grant enseigne mustrer :
Kar est il ore de quatre espiez naffrez.
Devers Espaigne si s’en est returnez ;
A l’ rei Marsilie ad tuz les faiz cuntez. Aoi.
CXXV
Reis Margariz suls s’en est repairiez.
Sa hanste est fraite e sis escuz perciez,
Desuz la bucle nen ont que demi pied ;
E de s’espée sanglent en ont l’acier,
E sun osberc rumput e desmailiet.
Si vient de l’ camp ù li colp furent fier ;
Deus ! quel barun, se il fust chrestiens !
Al’ rei Marsilie ad tuz les faiz nunciez,
Isnelement li est caüz as piez,
E si li dist : " Sire, kar chevalchiez ;
" Les Francs de France œuverez ennuiez
« De colps férir e les noz martirier.
« Perdut i unt e lances e espiez
" E de lur gent une grande meitiel.
« Cil ki sunt vif sunt mult afiebliet,
« Tuit li plusur navret e ensaingniet,
« E nen unt armes dunt se poissent aidier.
" Legièrement aurez les noz vengiez.
« Bon sunt à veintre, Sire, par veir saciez. "
