CVI
E Engeliers, li Guascuinz de Burdele,
Sun cheval brochet, si li laschet la resne,
Si vait férir Escremiz de Valterne :
L’escut de l’ col Ii fraint e escantelet,
De sun osberc li rumpit la ventaille ;
Si l’ fiert el’ piz entre les dous furcheles,
Pleine sa hanste l’abat mort de la sele.
Après, li dist : « Turnet estes à perte. »Aoi.
CVII
E Otes fiert un paien, Estorgant,
Sur sun escut, en la pene devant,
Que tut li trenchet le vermeill e le blanc ;
De son osberc li ad rumput les pans,
El’ cors li met sun bon espiet trenchant,
Que mort l’abat de sun cheval curant.
Après, li dist : « la n’i avrez guarant. » Aoi.
CVIII
E Berengiers il fiert Estramaris,
L’escut li frainst, l’osberc li descunfist.
Sun fort espiet par roi le cors li mist,
Que mort l’abat entre mil Sarrazins.
Des duze pers li dis en sunt ocis ;
Ne mes que dous n’en i ad remés vifs :
Ço est Chernubles e li quens Margariz. Aoi.
CIX
Margariz est mult vaillant chevaliers,
E bels e forz e isnels e legiers ;
« Le cheval brochet, vait férir Olivier,
L’escut li fraint suz la bucle d’or mier,
Lez le costet li cunduist sun espiet,