Tute li fraint la bucle de cristal,
L’une meitiet li turnet contreval ;
L’osberc li rumpt entresque à la carn,
Sun bon espiet enz el’ cors li enbat :
Li paiens chiet contreval à un quas.
L’anme de lui enportet Satanas.Aoi.
CIII
E sis cumpainz Geriers fiert l’Amurafle ;
L’escut li traint e l’osberc li desmailet,
Sun bon espiet li met en la curaille,
Empeint le bien, par roi le cors li passet,
Que mort l’abat el’ camp, pleine sa hanste.
Dist Oliviers : « Gente est nostre bataille. »Aoi.
CIV
Samsun li dux vait férir l’Almaçur,
L’escut li fraint k’ est ad or e à flurs.
Li bons osbercs ne li est guarant prud ;
Le coer li trenchet, le firie e le pulmun,
Que mort l’abat, qui qu’en peist o qui nun.
Dist l’Arcevesques : « Cist colps est de barun.Aoi.
CV
E Anseïs laisset le cheval curre,
Si vait férir Turgis de Turteluse :
L’escut li fraint desuz l’orée bucle,
De sun osberc liderumpit les dubles,
De l’ bon espiet el’ cors li met l’amure,
Empeinst le bien, tut le fer li mist ultre,
Pleine sa hanste el’ camp mort le tresturnet.
Ço dist Rollanz : " Cist colps est de produme. »Aoi.
1263. La bucle. C’est la proéminence qui est au centre de l’écu, l’antique umbo que l’on trouve dans le bouclier gaulois, romain et frank. (Voir un dessin très curieux dans l’Histoire du costume de J. Quicherat, p. 89.) Les bucles des écus étaient composées d’une armature en fer qui fallait saillie, qui formait mamelon. Dans les écus de luxe on réservait parfois un creux au milieu
