« Ferez i, Franc, kar très bien les veintrum. »
Munjoie escriet, ç’ est l’enseigne Carlun. Aoi.
CI
Barbarins est, d’un estrange païs.
Si apelat les altres Sarrazins :
« Ceste bataille bien la poüm tenir,
« Kar de Franceis i ad asez petit ;
« Cels ki ci sunt devum aveir mult vils :
« la pur Carlun n’i iert uns suls guariz.
« Or est li jurz que l’s estuvrat murir. »
Bien l’entendit l’ arcevesques Turpins,
Suz ciel n’ad hume que tant voeillet haïr ;
Sun cheval brochet des esperuns d’or fin,
Par grant vertut si. l’est alez férir,
L’escut li frainst, l’osberc li descunfist,
Sun grant espiet par roi le cors li mist :
Empeint le bien que mult le fait brandir,
Pleine sa hanste l’abat mort el’ chemin.
Guardet à tere, veit le glutun gesir,
Ne laisserat que n’i parolt, ço dit :
« Culverz païens, vus i avez mentit ;
« Carles mis sire nus est guarant tuz dis :
« Nostre Franceis n’unt talent’ de fuïr.
« Voz cumpaignuns ferum trestuz restifs.
« Nuvele mort vus estuvrat suffrir.
« Ferez, Franceis : nuls de vus ne s’ublit !
« Cist premiers colps est nostre, Deu mercit. »
Munjoie escriet pur le camp retenir.Aoi.
CIl
E Gerins fiert Malprimis de Brigal.
Sis bons escuz un denier ne li valt ;