« Succurrat nus li Reis od sun barnet. »
Respunt Rollanz : « Ne placet Damne Deu
« Que roi parent pur mei seient blasmet,
« Ne France dulce ja chedet en viltet.
« Einzi ferrai de Durendal asez,
« Ma bone espée que ai ceint à l’ costet ;
« Tut en verrez le brant ensanglentet.
« Felun paien mar i sunt asemblet ;
« Jo vus plevis, tuit sunt à mort livret. » Aoi.
XCI
« Cumpainz Rollanz, sunez vostre olifant :
« Si l’ orrat Carles ki est az porz passant ;
« Jo vus plevis, ja returnerunt Franc.
« — Ne placet Deu, » çoli respunt Rollanz,
« Que ço seit dit de nul hume vivant
« Que pur païens ja seie-Jo cornant !
« la n’en avrunt reproece roi parent.
« Quant jo serai en la bataille grant
« E jo ferrai e mil colps e set cenz,
« De Durendal verrez l’acier sanglent.
« Franceis sunt bon, si ferrunt vassalment ;
« la cil d’Espaigne n’avrunt de mort guarant. » Aoi.
XCII
Dist Oliviers : « D’iço ne sai jo blasme.
« Jo ai veut les Sarrazins d’Espaigne
« Cuvert en sunt li val e les muntaignes,
« E li lariz e trestutes les plaignes.
« Granz sunt les oz de cele gent estrange ;
« Nus i avum mult petite cumpaigne. »
Respunt Rollanz : « Mis talenz en est graindre.
« Ne placet Deu ne ses seintismes angles
" Que ja pur mei perdet sa valur France !
« Mielz voeill murir, qu’à huntage remaigne.
" Pur bien férir l’Emperere nus aimet. » Aoi.
