« En Rencesvals irez as porz passant,
« Si aiderez à cunduire ma gent. »
E cil respundent : « Sire, à vostre cumant.
« Nus asaldrum Olivier e Rollant ;
« Li duze Per n’avrunt de mort guarant ;
« Kar noz espées sunt bones e trenchanz :
« Nus les ferum vermeilles de cald sanc.
« Franceis murrunt, Carles en iert dolent
« Tere majur vus metrum en présent ;
« Venez i, reis, si l’ verrez veirement :
« L’Empereür vus rendrum recreant. » Aoi.
LXXXIII
Cil tient la tere entresqu’à la marine.
Pur sa beltet dames li sunt amies ;
Femme ne l’ veit vers lui ne s’esclargisset ;
Voeillet o mm, ne poet muer ne riet.
N’i ad paien de tel chevalerie.
Vint en la presse, sur les altres s’escriet,
E dist à l’ Rei : « Ne vus esmaiez mie,
« En Rencesvals irai Rollant ocire,
« Ne Oliviers n’enporterat la vie.
« Li duze Per sunt remés en martirie.
« Veez m’espée ki d’or est enheldie :
« Si la tramist li amiralz de Primes ;
« Jo vus plevis qu’en vermeill sanc iert mise.
« Franceis murrunt e France en iert hunie.
« Carles li vielz à la barbe flurie,
« Jamais n’iert jurz qu’il n’en ait doel e ire.
« Jusqu’à un an avrum France saisie,
« Gesir purrum el’ burc de Seint-Denise. »
Li reis paiens parfundement l’enclinet. Aoi.
973. El’ burc de Seint-Denise. Ailleurs, dans notre Chanson, c’est Aix qui est représenté comme le siège de l’Empire. = Cette partie du poème a sans